Неколку илјади луѓе се собраа денеска на демонстрации за женски права во Париз, на повик од организации и синдикати кои се борат против родова нееднаквост.
Жените кои учествуваа на протестите истакнаа дека се собрале затоа што „постојат закани за женските права во Франција и ширум светот“.
– Феминизмот никогаш никого не убил, мачизмот убива секој ден, порачаа демонстрантките со еден од транспарентите, пренесува дневниот лист Фигаро.
На друг транспарент што го носеа учесничките на протестот, беа испишани имињата на жртвите на фемицид од 2017 година.
Заедно со жените на протестите во Париз присуствуваа голем број млади луѓе и семејства, а меѓу главните барања на демонстрантите беше намалување на јазот во платите меѓу жените и мажите.
Според податоците на Националниот институт за статистика и економски студии, во 2023 година за исто работно време просечната плата на жените била за 14,2 проценти пониска од платата на мажите.
– Се мачиме и исклучително бавно напредуваме. Тоа станува неподносливо, изјави лидерката на синдикатот ЦФДТ, Мерилиз Леон.
Неколку помлади демонстрантки носеа транспаренти на кои пишуваше „Екстремната десница е непријател на жените“ и „Абортусот е основно право“.
Слика: Јутјуб принтскрин.