Словачкиот популистички лидер Роберт Фицо денеска го осуди планот на Европската унија да го запре увозот на руски природен гас до крајот на 2027 година со цел рускиот претседател Владимир Путин да остане без приходи за да води војна во Украина.
Европската комисија ќе презентира детален план следниот месец и ќе се стреми да ги забрани новите договори за гас со Русија до крајот на оваа година и постепено да ги укине постојните што сè уште се во сила во ЕУ до крајот на 2027 година.
Фицо рече дека планот е „апсолутно неприфатлив“ за неговата земја и дека неговата влада е подготвена да стави вето на него, додавајќи дека потегот би бил штетен за Словачка и за целата ЕУ, бидејќи би предизвикал зголемување на цените на бензинот.
Словачка има договор за снабдување со гас со Русија кој истекува во 2034 година, а Фицо изјави дека ќе бара надомест доколку планот за забрана биде имплементиран.
Претседателката на Европската комисија, Урсула фон дер Лајен, која се залага за планот, им рече на европратениците дека Русија повеќе пати докажала дека не е сигурен снабдувач со енергија.
-Зависноста од Русија не е лоша само за нашата безбедност, туку и за нашата економија. Нашите цени на енергијата не можат да бидат диктирани од непријателски настроен сосед, рече таа.
Фицо, исто така, го отфрли предлогот за суспендирање на увозот на нафта и нуклеарно гориво од Русија во Европската Унија.
Унгарија и Словачка, чии лидери се сметаат за најблиски сојузници на Путин во Европа, ја блокираа воената помош на Европската Унија за Украина и се очекува да се спротивстават на плановите на Европската комисија за гас.
Фицо е познат по своите проруски ставови и отворено ја оспорува политиката на ЕУ во врска со Украина.
Тој е единствениот лидер на ЕУ што присуствуваше на церемониите во Москва во петокот по повод 80-годишнината од поразот на нацистичка Германија во Втората светска војна, што е негова втора посета на Москва од декември.