Претседателката на Европската комисија Урсула фон дер Лајен претрпе пораз во правниот спор поради СМС пораките испратени до извршен директор на фармацевтска компанија во врска со вакцина против коронавирус. Судот на Европската унија одлучи дека Комисијата не дала веродостојно објаснување зошто ги нема бараните документи. Судиите ја прогласија одлуката за необјавување на бараните пораки за ништовна. Пресудата се уште не е правосилна.
Фокусот е на договорот меѓу Европската комисија и производителот на вакцини Бионтек/Фајзер од пролетта 2021 година. Двете страни се согласија во тоа време да обезбедат до 1,8 милијарди дози вакцина против коронавирус, обемот на договорот беше проценет на 35 милијарди евра. Како што објави „Њујорк тајмс”, личниот контакт помеѓу Фон дер Лајен и извршниот директор на Фајзер, Алберт Бурла, бил клучен за договорот, двајцата комуницирале и преку СМС.
Поранешната шефица на бриселското биро на „Њујорк тајмс”, Матина Стевис-Гриднеф, заедно со нејзиниот весник, побараа пристап до сите СМС пораки разменети помеѓу фон дер Лајен и Бурла во периодот од 1 јануари 2021 година до 11 мај 2022 година. Комисијата го отфрли барањето со образложение дека не поседува такви документи. Новинарката и нејзиниот весник го оспорија ова пред Судот на ЕУ.
Судиите сега утврдија дека Комисијата мора да даде веродостојни објаснувања зошто овие документи не може да се најдат. Но, Европскиот суд не опиша точно како и каде ги барал. Исто така, не е јасно дали пораките се избришани – и дали тоа се случило доброволно или автоматски или дали мобилниот телефон на Фон дер Лајен оттогаш бил заменет. Понатаму, не било веродостојно објаснето зошто Комисијата не ги сметала разговорите доволно важни за да бидат зачувани.