Берлин, 15 септември 2025 – Германија нема да се откаже од амбициозната цел: 80% од електричната енергија во земјата до 2030 година да доаѓа од обновливи извори. И покрај задоцнувањата во развојот на ветерните капацитети, владата оценува дека таргетот е „реалистичен и достижен“, покажува новиот извештај за енергетската транзиција, кој денеска го претстави федералната министерка за економија и енергетика Катарина Рајхе.
Извештајот, изготвен од Институтот за енергетска економија при Универзитетот во Келн (EWI) и консултантската фирма BET, предвидува дека бруто-потрошувачката на електрична енергија во 2030 година ќе изнесува меѓу 600 и 700 TWh – значително помалку од претходните проценки од 750 TWh.
„Сите релевантни студии покажуваат дека растот на потрошувачката е послаб од очекуваното. Затоа, и со поскромно проширување на офшор ветерната енергија, целта од 80% останува достижна,“ рече Рајхе.