Конзервативната влада на италијанската премиерка Џорџа Мелони денеска стана најдолговечната влада во поствоената историја на Италија, земја позната по честите и краткотрајни владини кабинети.
Владата на Мелони денеска го одбележа 1.413-от ден на власт без прекин, со што го надмина претходниот рекорд на владата на Силвио Берлускони од периодот 2001–2005 година. По Втората светска војна, Италија како република имаше дури 68 влади, при што ниту една досега не успеала да издржи цел петгодишен мандат. Владата на Берлускони беше најблиску до тоа, но владината криза го принуди накратко да поднесе оставка пред повторно да формира кабинет.
Мелони, која е првата жена на чело на италијанската влада, го прославува овој рекорд со својата партија во Бари, на голем предизборен митинг. Со својот директен и прагматичен пристап, таа успеа да ги избегне политичките кризи, фракциските судири и губењето пратеници и министри – проблеми што редовно ги рушеа нејзините претходници. Откако стапи на функцијата во октомври 2022 година, нејзината владејачка коалиција остана непроменета, што претставува реткост во современата италијанска политика и клучен столб во нејзината кампања за реизбор.
Кога дојде на власт, нејзиниот избор предизвика загриженост кај европските сојузници и на финансиските пазари поради десничарските корени на нејзината партија. Сепак, Мелони управуваше прагматично: цврсто ја поддржуваше Украина по руската инвазија, соработуваше со европските институции, се придржуваше до фискалната дисциплина и одржуваше добри односи со американскиот претседател Доналд Трамп.
Парламентарните избори во Италија се закажани за крајот на 2027 година, а политичките аналитичари посочуваат дека прашањето за гласачите веќе не е дали Мелони може стабилно да владее, туку дали резултатите од овој невообичаен период на стабилност заслужуваат уште еден мандат. ссм/
фото: ЕПА архива