Две недели по Европските избори станува појасно дека граѓаните во следните пет години очекуваат од институциите на ЕУ да изградат посилна, поправедна и подобра Европа за сите Европејци, изјави претседателката на Европарламентот, Роберта Мецола на прес-конференција по нејзиното учество на Самитот на Унијата.
Предизвикот сега е како тие пораки од изборите да се претворат во политичка програма, која ќе биде сериозна, испорачлива и спроведлива, истакна Мецола
Според неа, изборните резултати покажале дека Европејците сакаат заштита на европските вредности и безбедноста да бидат главен приоритет на ЕУ, што ќе значи продолжување на поддршката за Украина, зајакнување на капацитетите на Унијата за реакција во кризни ситуации и остварување стратешка автономија на блокот.
Мораме Европа да ја доближиме до она што го очекуваат граѓаните и да испорачаме посилна, поправедна и подобра Европа за сите Европејци. ЕУ мора да испорачува согласно очекувањата на граѓаните. Одговорноста е на нас, ако не испорачаме, ќе зајакнуваат оние што сакаат да ја уништат ЕУ, изјави Мецола, нагласувајќи дека тоа е пораката што таа ја сфатила од изборните резултати и растот на поддршката на десничарските и евроскептичните сили.