На последниот состанок годинава, Европскиот совет денеска во Брисел ќе расправа за војната во Украина, проширувањето на ЕУ, ситуацијата на Блискиот Исток и миграцијата, се наведува во агендата на состанокот.
Состанокот на шефовите на држави и влади на земјите од ЕУ за првпат ќе го води новоизбраниот претседател на институцијата Антонио Кошта.
На средбата ќе учествува и украинскиот претседател Володимир Зеленски.
Се очекува разговорите да бидат опфатени со снабдувањето со оружје на украинската страна, можностите за заштита на украинската енергетска инфраструктура и спроведувањето на санкциите на ЕУ против Русија.
Од почетокот на рускиот напад на Украина, ЕУ му обезбеди на Киев вкупно близу 124 милијарди евра.
Учесниците на состанокот ќе разговараат и за можностите за постигнување договор за прекин на огнот меѓу Израел и Либан, како и за последните настани во Сирија по падот на режимот на Башар Асад.
Ќе зборуваат и за односите на ЕУ со САД и Велика Британија.
Планирано е да се разговара за подготвеноста на ЕУ за одговор на кризи, потребата од подобрување на безбедноста на надворешните граници и да се зголеми бројот на враќања на мигранти без основа за престој.
Разговорите најверојатно ќе опфатат проценка на настаните во Грузија и Молдавија по неодамнешните избори.